空氣污染致癌 港人避無可避
秋高氣不爽，一片霧茫茫。香港空氣質素愈來愈差，惡劣程度可以倣效內地網民以港版《沁園春．霧》形容：香江風光，千里朦朧，萬里煙飄。望維港兩岸，濃霧莽莽，獅子山下，陰霾滔滔……
講起真係得人驚，呼吸空氣原來隨時可以致癌o架。嗱，世衞組織首次將空氣污染列作最高級別嘅「第一類致癌物」，同煙、酒及砒霜等睇齊，甚至比二手煙尤有過之。世衞專家係咁講嘅，有充分證據顯示，空氣污染令肺癌及膀胱癌死亡風險上升，淨係二○一○年，全球因空氣污染造成嘅肺癌死亡達二十二萬三千人。簡單啲講，大家每日呼吸嘅空氣，根本就係「混合致癌物」，避無可避。尤其係香港，空氣污染早就臭名遠揚。
即係咁，酒可以唔飲，煙可以唔吸，食物可以小心選擇，但空氣唔可以唔呼吸。香港到處烏煙瘴氣，危機處處，再咁落去，真係死得人多。
所以話，改善空氣質素刻不容緩。可惜港府治污不力，減排一味大隻講，最離譜係空氣質素指標足足二十六年冇更新，就算明年更新，都只係採用世衞組織最寬鬆嘅標準，淪為國際笑話，簡直攞市民生命較飛。
呢，舊年世衞組織公布全球二○○八年因空氣污染導致嘅死亡率，香港高踞第八位，比中國內地、印度、越南、孟加拉、斯里蘭卡等地仲要死得人多。而早前本地有項研究亦指出，過去七年香港路邊二氧化氮水平持續上升，每立方米達到二百五十微克，超出世衞嘅標準五倍，去年更加係香港路邊空氣污染有史以來最嚴重嘅一年。七年來，空氣污染估計造成逾七千人提前死亡，亦令政府需額外付出超過十五億元嘅醫療開支，真係唔講得笑o架！
講到底，港府環保政策來來去去淨係識講「錢」，無論係膠袋徵費，或者係即將實行嘅家居垃圾徵費，以及醞釀中嘅舊電器、玻璃樽回收計劃，次次向市民開刀，港府自己就毫無承擔。當局對空氣污染束手無策，一味以停車熄匙、更換柴油車等小兒科敷衍民意，簡直不知所謂。
前朝曾蔭權爵士甘當「氣候逃犯」，現屆政府口口聲聲減少污染排放，弊在志大才疏，講多過做。唉，等港產官僚換回藍天白雲，蚊都瞓，蛇都死喇，叮！
