SUN搞作：網絡小說：高主教獻世良言
「由於我對唔住太多前度女友，所以我依家決定反對婚前性行為。」高主教悲痛地向課室一班哲學系毒男師兄弟做見證：「大家千祈唔好學我！浪子回頭入贅豪門呢啲嘢，你哋再學，就會好低莊！」
師弟們聽到流晒口水，明仔更妒忌得將手中著名哲學家康德的《一切能作為學問而出現的未來形上學之序論》擲在桌上，酸溜溜地罵康德：「讀你有Ｑ用咩？最多咪寫稿嗰陣，用嚟撐吓字數呃稿費！唔得，三個字，我要咬軟！」一時葡萄味充斥課室，高主教為了安撫大家，便宣說：「唔好妒忌我，上帝係公平嘅。『神就照着自己的形象造人，乃是照着他的形象造男造女。』男同女都已經一樣樣喇，咁你哋醜樣又好，好似我咁靚仔都好，咪即係上帝咁嘅樣啫，不過……」高主教說到此處，竟哽咽起來！
眾人忙問：「高主教！你無事嘛？」高主教雙眼通紅回道：「無，港視無得發牌，生得我咁靚仔又點吖，都無地方出鏡啦！我一諗到咁，就忍唔住想喊。」高主教學關海山李香琴振臂高呼：「世界末日喇！慘無人道呀！我要上電視呀！」
「在上有權柄的，人人當順服他，因為沒有權柄不是出於神的。凡掌權的都是神所命的。高主教，你唔係應該要順服當權者唔發牌嘅決定咩？」不知趣嘅豬西文一路搔胳肋底，一路用蘇格拉底式反詰。
「嘻嘻，一早預咗有人咁問……」高主教閉眼合十：「發牌嗰件所謂『一男子』嘅奴才，根本就無柄嘅！」
