SUN奇古怪：SUN潮語：【TVB體】
「TVB體」呢個潮語，最先係出現喺網絡討論區上，意思即係經常出現喺TVB電視劇中嘅對白。要知道TVB開台四十六年，到咗今日好多對白都係脫離現實，仲要好多句都係套套劇都會出現，無限loop不斷重複再重複，漸漸呢啲老套對白就可以堆砌成一種文體，成為「TVB體」。「TVB體」嘅對白包括：「你餓唔餓呀？我煮個麵你食吖？」、「最緊要一家人齊齊整整……」、「發生呢啲事，大家都唔想……」、「感情嘅嘢冇得勉強……」呢啲千篇一律嘅對白。再加上例牌劇情包括係偷聽、失憶、小產、第三者、大結局、BBQ等，真係大佬大嫂阿哥細佬……人人都可以做編劇！唔怪得之，編劇嘅人工低到一個貼近洗碗清潔工嘅水平。
擾攘咗幾年，政府終於發出兩個新嘅電視牌照。姑勿論結果是否令市民滿意，但係起碼都會令市民有更多選擇，唔使被迫日日都係無綫亞視。尤其係近年，香港電視節目質素大插水，創意零蛋沉悶無趣仲要無限量派膠。ATV已經當佢唔存在，但一台獨大嘅無綫，得閒整個May姐出嚟帶啲四五線姐仔飲飲食食，不時冇嘢好講就哈哈哈哈地大笑，示範烹飪嘅時候係唔係都狂落雞汁，我明白節目有贊助產品要曝光，但你都可以用個腦諗吓點樣令產品出得自然啲o架？有網民甚至話要杯葛產品，呢啲可謂係反宣傳，如果我係雞汁嘅市場對手，我會即刻出廣告反擊搶客。點解最近電視發牌事件會鬧得滿城風雨？因為電視嘅影響力實在太大，再加上香港人習慣開住部電視當背景聲，所以電視係一部全天候嘅洗腦機器。網上甚至有人失戀，都要求其他人用「TVB體」安慰一下！所以都咪話TVB對世界無貢獻……
「TVB體」加例牌膠劇情而製成嘅TVB膠劇，香港人你絕對無權反抗嘅，可能遲啲TVB發明一部編劇機，咁就可以連寫都慳番。橫掂你班香港人，無論TVB播乜，你哋咪又係一路鬧一路睇？你話係咪？
