政壇：搞搞政：保衞郊野公園 林超英打口水戰
近排郊野公園用地嘅發展同保育引起各界關注，尋日環保團體「保衞郊野公園」搞咗個論壇，邀請咗六位保育人士出席，鄉議局就只有永遠顧問李耀斌一個做代表。本來局勢係一面倒，但鄉議局動員能力驚人，一吹雞，百幾二百個鄉紳父老齊到場，不時對台上發言人士嘅鄉郊用地言論報以「噓」聲，瞓身環保工作嘅前天文台台長林超英尋日都有出席論壇，仲喺台下以塘邊鶴身份發言，啲街坊亦唔放過佢，刁難提問令黑英都窒一窒。
設計圖片
尋日嘅論題包括鄉郊土地嘅使用及丁權，公共專業聯盟政策召集人黎廣德喺論壇提出，港府原本額外預留多三百幾公頃土地畀原居民起丁屋，理應夠晒有餘，但唔少鄉民寧願將丁權補地價轉手賣畀發展商起豪宅，喪失丁權原意。佢對新界原居民享有嘅丁權一再質疑，激慶唔少村民，噓聲此起彼落。
林超英就話，若新界鄉郊土地發展冇規律，都可能陷入失控，有村民就趁機提問，佢有份做委員會環境及自然保育基金買咗乜嘢鄉郊地？有乜嘢實際行動？黑英當堂啞咗，轉而話佢哋唔係有錢佬，亦唔係一早儲定錢嚟買地。
