政壇：吳得掂驚爆港府機密
政府成日講機密、保密，估唔到最大嘴巴嘅正正係佢哋。話說尋日非牟利幼兒教育機構議會有個研討會，原本教育局局長吳克儉（吳得掂）都有份參加，仲擔任研討會開幕主禮嘉賓。點知活動下午兩點開始時，都未見佢嘅蹤影。議會主席曾甘秀雲致詞時就解釋，兩日前就收到吳得掂通知，話特首梁振英（CY）尋日要開一個緊急會議，所有局長都要出席，所以趕唔切嚟開幕禮，改為做總結致詞咁話。嘩！政府高層開緊急會議，大鑊嘢？傳媒即刻聞風而動，結果虛驚一場，但吳得掂爆政府機密就鐵證如山，做官做到佢咁，真係令人叫絕！
設計圖片及對白
民望長期包尾
局長有事出席唔到公開活動好平常，解釋吓就得，係咪要爆料就見仁見智嘞。但吳得掂就連CY開緊急會議都洩露出去，係佢太坦白定太蠢呢？須知道官府一舉一動都可大可小，尤其係涉及咁高層嘅「緊急會議」。事關呢個時候開會，大部分人都會估係為免費電視發牌風波撲火。
同樣出席研討會嘅行政會議成員陳智思就澄清話，其實佢都要出席呢個會議，但就唔係咩緊急會議，只係恒常會議啫。被問到係咪傾電視發牌事件，佢就否認話︰「發牌就唔會叫局長（吳得掂）啦！」研討會最後十五分鐘，吳得掂匆匆趕到，唔知佢係咪知衰，改口話只係有工作事項要傾喎。據了解，其實尋日開嘅係政府問責官員一個腦震盪會議啫 ，隔一、兩個月就會開一次。
吳得掂出任問責官員以來，民望長期包尾，小學派位「返回機制」搞到家長一頭煙，近期幼稚園派入學申請表掀起「搶表潮」，佢亦苦無對策。做唔到嘢就乖乖地等「奶媽」政務司司長林鄭月娥湊囉，家吓仲蠢到惹單洩露政府內部機密事件出嚟，果然吳得掂！
