食物回收零支援 源頭減廢大隻講

唔講唔知，原來香港每日產生嘅廚餘高達三千六百噸，佔都市固體垃圾總量四成，足夠裝滿一百五十部雙層巴士。美食天堂變成「浪費天堂」，一來加重堆填區壓力，二來暴殄天物，簡直係罪過。試諗吓，非洲好多兒童想食都冇得食，而港人就將一車車食物當垃圾倒咗去，你話呢個究竟係乜嘢世界！

可能係知恥近乎勇啩，港府煞有介事將「消滅廚餘」列入政綱，聲稱要從速處理源頭減廢，推展全港性廚餘回收計劃，仲會大力支持循環再造，鼓勵大家透過「減廢、再造、再生」三大途徑減少食物浪費喎。可惜吖，港產官僚講就天下無敵，做就無心無力，從速處理係假，闊佬懶理至真，所謂廚餘回收計劃到依家仲係無影無蹤。有環保團體訪問全港十五個食物回收機構，發現普遍面臨資金、人手同儲存地方不足等困難。曾經有機構向可持續發展基金、環境及自然保育基金申請撥款，點知統統冇下文，搞到資金不繼，瀕臨倒閉。

最諷刺嘅係，港府早前撥款二億元資助食物銀行，居然規定只准購買，唔資助回收食物，搞到回收機構望門興嘆。太一叮諗極都唔明，食物銀行同食物回收同樣幫到窮人，後者仲可以減少浪費，有利環保，點解反而得唔到資助呢？港府善財難捨，冤枉甘心，淨係考評局兩年納空租已經嘥咗三百六十萬元，反而同志願機構斤斤計較，簡直本末倒置。

所以話，官僚減廢，等同廢噏，唔止食物回收機構求助無門，廢物回收業者同樣係自生自滅，苦苦掙扎。你知啦，廢物回收業利潤有限，缺乏政策上嘅配合及支援，根本不成氣候，港府口惠而實不至，所謂源頭減廢純屬大隻講咋。

呢，睇吓南韓，上世紀九十年代起推廣惜食文化，除咗積極宣傳珍惜食物，仲安排志願機構主動上門，向民居、餐廳等分類回收食物，經過多年努力，成效顯著，超過九成廚餘被再造成肥料、飼料、能源等等，只有不足半成送去堆填區或焚化。如果港府減廢做到呢個成績，仲使鬼硬銷堆填區擴建計劃咩！

事實證明，事在人為嘅啫，源頭減廢根本唔難，關鍵在於官員係咪坐言起行，有冇承擔，可唔可以攞出實質政策。嗱，咪話太一叮唔提醒吖，港產官僚得過且過，一日拖過一日，遲早拖到堆填區爆滿，到時香港想唔變成臭港都幾難，叮！