少膽虫一早返到公司，遠遠就見到肥豪手舞足蹈，心諗︰「唔通肥豪要學條鬼妹，玩辭職狂舞派？」不過又見淫賤黎喺肥豪身邊，猛叫︰「英呀！英呀！」一見腦細大讚，少膽虫即有樣學樣，跳埋一份。點知淫賤黎就一肚火咁行過嚟……

「少膽虫，你做咩無端端跳舞？係咪想學條鬼妹玩唔撈？」淫賤黎扯火地問。少膽虫百辭莫辯︰「腦細，我見肥豪跳我先跳，你仲猛讚佢英添……」電光火石間，一疊厚厚《爛果》，就拍在少膽虫頭上︰「係唔知點解《爛果》編輯部咁多烏蠅，我叫肥豪幫手拍咋！」

「咁咪即係《爛果》拍烏蠅！」少膽虫衝口一句。淫賤黎雖然火上心頭，但亦只好同意︰「明明烏蠅邨喺屯門，點會過嚟呢邊？」淫賤黎滿臉疑惑，少膽虫只好稍作解釋︰「腦細，壹全霉大樓喺正堆填區，仲有……」少膽虫欲言又止，淫賤黎自然不滿︰「仲有咩？快啲講！」

正當少膽虫想放膽開口之際，一群烏蠅突然包圍淫賤黎，「所謂物以類聚，腦細因為你係名副其實嘅『至蠅』囉！」

第一手消息請下載on.cc東方互動iPhone/iPad/Android/Windows Phone Apps