城中鏡：鄺美雲一晚籌逾600萬
國際佛光會香港協會會長Cally鄺美雲向來係籌款天后，年前幫理工大學「撲水」，數字爆晒燈。今次輪到幫番佛光山香港分會籌款，一晚係咁意籌到六百幾萬元。Cally話，估唔到幾十張飯枱拍埋變大餐枱，簡單擺二十圍，反應咁好，喜出望外。籌得嘅善款將用作資助義工探訪獨居長者或海外考察，此外有乜天災人禍，佢哋會第一時間賑災。
鄺美雲為Keep Fit，夜晚戒吃澱粉質，一年間成功減走十多磅。
除咗籌款，Cally不時向朋友宣揚佛偈，嚟緊將推出第二隻佛歌碟，灌錄工作已搞掂，好快就面世喇。
唔知係咪忙得滯，見Cally清減唔少，身上無一絲肥肉，原來過去一年佢刻意喺晚餐戒食澱粉質，任何粥粉麵飯一概唔掂，午餐就可以隨意咁食，加上每星期搵老師私人授舞兩至三日，Ｓ蛇腰「失而復得」!
