城中鏡：楊張新悅再試果汁排毒
好多人都想排毒瘦身，而教育局前政治助理楊哲安嘅太太楊張新悅（前名張燊悅）尋日出席果汁排毒慈善活動時話，自己一直想試排毒療程，但之前聽過嘅方法都係十幾日斷食又或者係食啲好奇怪嘅食物，而飲果汁就方便容易得多。
楊張新悅試咗果汁排毒療程後整個人refresh咗。
佢話：「我喺一年前首次試呢個療程，為期三日，完咗之後感覺好Fresh，亦都令我人生有好大轉變，我原本好鍾意食甜品，一餐要食兩個甜品，三日後我竟然冇咗甜品癮，將我嘅身體reset，我覺得心靈同身體都好富裕，唔再需要外界嘅嘢去令自己開心，由嗰時到依家已經一年冇食甜品。」而且呢一年裏佢仲瘦咗十多磅添！不過，佢近日開始想食甜品，所以係時候再進行第二次療程，佢話仲會介紹畀老公同家人一齊試。
