城中鏡：趙式慶變溫柔爸
眾所周知，商人趙世光嘅孺仔趙式慶係習武之人，近年仲高調宣揚中國武術，但就鮮有談及家人嘅事，但佢日前出席老友「手套女王」昌利行董事Juliana林曉盈嘅公司成立五十周年晚會時，竟然罕有咁暢談仔女性格。
趙式慶一講起仔女就慈父上身，大談仔女嘅性格同興趣。
最近忙於籌備慈善演唱會嘅小恩子（右）都嚟撐林曉盈（左）。
龔嬿（右）最近打泰拳瘦身成功，而好友廖偉芬（左）就體驗窮人生活有所得着。
講到仔女，趙式慶即由不苟言笑變為慈父上身，佢話四歲大女性格好女仔，鍾意跳舞同畫畫，反而對武術冇乜興趣；而細仔只得一歲，未係時候學功夫，但性格都幾好動喎。佢話會對子女嘅入學問題保持自然心態，正如自己細個時，爸爸對佢從來都唔擔心。話說佢於英國留學畢業後，曾到內蒙古居住一年，喺浩瀚大自然中游走，深感快樂同滿足感非物質所能賦予。
近年佢有感中國文化正「病危」，亦關注內蒙古少數民族文化逐漸消失，四年前便成立「地脈基金會」，供養當地山區貧困兒童上學之餘，將音樂、語言等非物質文化一一記錄，協助其保育及承傳，自此經常穿梭中港兩地，積極推動保育工作。
林曉盈嘆廠家唔易做
當晚，工業總會榮譽主席Roy鍾志平、「鮮花公主」龔嬿、參加完電台「窮富翁大作戰」嘅廖創興家族後人廖偉芬、社企Green Monday聯合創辦人楊大偉、金利來集團行政總裁曾智明太太「小恩子」黎瑞恩等都有捧場。林曉盈坦言廠家唔易做，佢作為公司第二代掌舵人，深感「創業難守業更難」。阿Roy聞言就話：「冇守業，只有不停地創業」，勉勵對方要勇於創新。
