政壇：搞搞政：預算案提早辯論迎戰拉布?

仲記得部分泛民議員為迫使政府推行全民退休保障計劃，喺今年四月針對一三至一四年度預算案進行拉布，差啲搞到政府要好似依家美國政府咁，因為無錢出糧畀公務員而被迫暫停公共服務，拉布最後持續咗差不多一個月，到五月二十一日先三讀通過預算案，僅僅避免到政府陷入癱瘓，令財爺鬍鬚曾鬆一口氣。

明年預算案辯論早咗，就算有議員密謀再玩拉布，政府都變相多咗時間準備迎戰，令人猜測提早辯論係政府刻意安排。但有熟悉相關程序嘅官員透露，預算案辯論日期一向無明文規定，最主要係遷就復活節假、每年三月喺北京舉行嘅人大政協兩會會議，以及政府與立法會同期舉行嘅其他活動，所以一般都喺四月初開始辯論，早起上嚟亦試過三月底就開波，今年拖到四月下旬開始辯論反而係遲咗。

不過，最重要嘅係，即使包括梁國雄在內嘅「拉布四子」下定決心再玩拉布，提早一個星期辯論預算案，都只係會拉布多一個星期，所以提早辯論根本無任何實質作用，因此來年嘅預算案時間表同拉布問題完全無關。