政壇：卡賓先生搵COOL魔助陣
「COOL魔」熱潮未散，仲殺入新股添。據聞今日開始招股嘅內地男裝服飾公司卡賓，請咗張智霖撐場，出席今日舉行嘅投資者推介會，而身為創辦人、主席兼首席設計師嘅Cabbeen（楊紫明）亦都唔輸蝕，專程設計咗件戰衣，尋日喺記者會已亮相。
聽聞卡賓先生着住呢套戰衣係特登為上市設計嘅。
卡賓係主打自家設計同品牌，尋日記者會除有一眾高大威猛嘅model展示一系列自家品牌作品外，人稱Mr Cabbeen（卡賓先生）亦都有備而嚟。話說尋日佢出席記者會，有別於一般公司老細「西裝骨骨」嘅打扮，聽在場嘅賓客講，話呢件衫係Cabbeen特登為上市設計，着住件戰衣零舍唔同喎！
市場瘋傳「COOL魔」侵襲今日舉行嘅投資者推介會，八卦問吓公司管理層啦，原來佢哋係睇中咗「COOL魔」張智霖健康、陽光嘅正面形象，仲話覺得佢有衣着品味，咁話唔埋有合作機會，請「COOL魔」做埋代言人喎？不過，公司就好口密，只係笑笑口話「唔排除有合作機會」。
