政壇：白鴿黨南區議席危危乎
近日政圈熱論退出咗白鴿黨嘅南區區議員馮煒光，會接任政府新聞統籌專員一職，如果成事嘅話，其海怡西選區議席就要補選。雖然有關傳聞至今未能證實，但各黨派已對佢個議席虎視眈眈。不過，白鴿黨連人選都未有，就算補選都唔知有冇人出選，睇嚟該黨認真危危乎。
白鴿黨原本有五個南區區議員，但馮煒光退黨後已少咁一個，而本身係南區利東區議員嘅羅健熙亦面對「夾擊」。話說近期建制派喺利東開咗個辦事處，為後年區議會做準備，加埋白鴿黨兩個辦事處同另一委任議員嘅辦事處，羅健熙都講笑話：「辦事處多過便利店！」對於建制派乘勝追擊，羅健熙都好頭痕。睇嚟該黨都要檢討吓點樣做番好啲地區工作，否則該黨嘅南區議席肯定買少見少。
