政壇：林偉強上海研習難去蒲
本港好多政商界人士以往都有組團去北京上國情班，新界鄉議局尋日開執委會，亦宣布局方將於本月十九至二十四日，去上海浦東幹部學院舉行首次國情研習班，共有三十七名成員參加，而未能同行嘅鄉議局主席劉皇發就自掏腰包贊助學員一半學費，即每人一千元，仲搵咗副主席林偉強帶隊。不過，發叔曾形容林偉強係「we wet強」，再加上佢試過喺內地有「不良紀錄」，曾被人見到同一名女伴夜晚去飲茶撐枱腳，更係被熟人目擊成個過程，莫非發叔唔怕佢今次帶成班鄉紳去威咩？
設計圖片及對白
林偉強就話今次行程好緊迫，而且好嚴肅，純粹同大家去溫故知新，學習國情喎。換言之，即係冇時間we wet嘞！睇番佢哋今次嘅行程，又真係幾緊迫，學習內容包括國際形勢、《基本法》輔導、城鎮化進程、以及中國近代史同近代嘅香港等。除咗第一日晚上抵埗有聯歡活動，其餘四日都由早上八點半鐘開始上課，中午有幾個鐘頭休息及午飯，之後又要聽講座或參觀至下午五點半鐘結束。至於五點半鐘之後有咩活動？咁就要睇吓林偉強有冇安排喇！
打樁累大樓現裂痕
執委會又傾過行政總監林祿榮因退休而辭職，要開始招聘請人。除咗人事變動之外，局方仲發生地震添！話說尋日會議進行期間，鄉議局成個會議廳每隔幾分鐘，都有一陣強烈嘅震動。當大家以為有地震之際，有委員就話原來對面有打樁工程。有委員仲話局內辦公室亦出現咗一條由地下至天花咁長嘅裂痕添。
大樓會唔會有結構危險o架？有委員解釋，大樓已落咗約二十條樁，安全結構上完全冇問題，出現裂痕只係隱藏性缺陷，所以一定會向大樓建築承辦商追討喎。大樓落成至今出現嘅問題真係未停過囉！
