納空租倒錢落海 考評局表現肥佬
香港考試及評核局，簡稱考評局，但係家陣睇怕要改名咯，改叫：大花筒局。嗱，考評局早前被踢爆損公肥私，向員工豪派七百萬元花紅，已經畀人鬧爆洗腳唔抹腳，點知狠批之聲話音未落，又被揭發轄下電子評核中心納空租，白白將公帑倒落鹹水海，你話嘞，考評局係咪一個超級大花筒吖？
事情係咁嘅，考評局年前向立法會申請撥款逾五千七百萬元，租用港島商廈作電子評核中心，每月開支逾六十一萬元。但本報發現，除咗三至八月嘅考試季節之外，評核中心喺其餘半年只開放八十五日，換言之，有至少三個月納空租，兩年來白費超過三百六十萬元，問你服未。
考評局上次爆出私分花紅醜聞，死撐狡辯想激勵士氣，挽留人才，今次被踢爆評核中心納空租養蚊，唔知又有乜嘢解釋呢？咁樣糟蹋納稅人嘅血汗錢，唔通想激發怨氣，自嘲蠢材？為防考評局諸多狡辯，本報記者多月來曾先後五次喺辦公時間到中心嘅兩層辦公室實地視察，發現其中一層每次都烏燈黑火，人去樓空，而另一層雖然有運作迹象，但逾萬呎辦公室只有約三名員工駐守，當中一人仲係保安員添，中心嘅使用率如何，畫公仔唔使畫出腸啦。
節約資源，成本效益，呢個道理小學生都識啦，考評局高官明知故犯，樹立壞榜樣，仲邊有資格評核學生呀。正如立法會議員話齋，明年本港只有文憑試一個公開試，評核中心養曱甴嘅日子只會愈嚟愈多嘅咋，除非考評局厚面皮到自我評核為超級大花筒部門啦，唔係嘅話，唔該物盡其用，另覓空置校舍作評核中心。其實，一直以嚟，考評局其他評核中心都係位於當局辦公室，或者由空置校舍改建而成，港島評核中心偏偏別樹一幟，浪費公帑租用商廈，根本就係冇嗰樣整嗰樣，搵納稅人笨，叮！
咁講啦，納空租醜聞係一塊鏡子，唔止係考評局大花筒作風嘅縮影，更加係考評局管理混亂嘅寫照。先唔講中飽私囊分花紅事件吖，評核中心喺乜嘢背景之下誕生o架？咪因為考評局亂象叢生，經常唔係遺失試卷，就係改錯試卷囉，所以先至要補鑊改以評核中心模式運作，點知一樣搞到一鑊粥。
正所謂，其身不正，何以正人。考評局烏煙瘴氣，醜聞百出，如果由市民評核，表現一定年年肥佬吖，叮！
