SUN搞作：少膽虫手記：爛果的新畫
「蘇！同我過嚟！」扮晒埋頭苦幹嘅fing春蘇見中頭獎，好似星夢鄭俊弘上八度高音咁乸埋塊面去搵淫黎，淫黎指住面前白紙問：「你覺得幅畫點？」膠蘇馬上fing晒春，對幅「畫」畀出拇指，淫黎追問，「好喺邊先？」聽此一問，膠蘇腦便秘，唯唯諾諾：「腦細，不嬲都係你話點就點o架啦……」聞之淫黎即刻變臉！
「挑！無啲創意！做新聞最重要係咩呀？創造力呀！」匿埋嘅少膽虫，知道夠鐘表演，即刻加把嘴：「歌都有得唱啦：創作力量同幻想，會嚇你一跳！」見到少膽虫，淫黎終於有番笑容。入世未深嘅膠蘇，想挽回臉子：「腦細，你之前話求真都好重要o架……」淫黎再次黑面，「求真？你啱啱咪求咗鑊泡囉！」
「腦細，我之前叫腦腫唔好屈奮強住，係佢死都要登……」聽到膠蘇又再衰多鑊，少膽虫心裏暗笑。淫黎翹起二郎腿，問：「蘇！你覺得龍虎豹同《紐時》嘅分別喺邊？」「前者宣淫販賤！」淫黎即刻成隻鞋飛落膠蘇度，「你做咗咁耐，都唔識分第壹大報嘅取材對象，我炒咗你！」
