城中鏡：張苡澂帶病撐「老友記」
香港拳擊總會永遠榮譽主席徐家傑同Venus張苡澂兩師徒前日一齊擔任神秘嘉賓支持祖父母節活動，仲同主辦機構代表一齊為第十二屆祖父母節進行換屆儀式，齊齊呼籲加強社會對敬老護老嘅觀念，以及推動青少年注重三代之間嘅關係。
徐家傑（左）同張苡澂兩師徒齊撐祖父母節。
Venus話公司安排嘅工作緊密，最近開始發燒喉嚨痛，依家喺內地客串一部電視劇，因為祖父母節對提升三代關係有重要嘅意義，所以佢特登喺深圳趕返港出席活動，之後再趕返深圳。佢又話呢段時間睇咗醫生，一邊食藥一邊工作，希望唔會影響演出嘅表現，仲話好開心主辦單位為佢做咗個巨型紙牌，比佢真人仲要大喎！
徐家傑亦係喺內地趕返港支持徒弟Venus，佢勸勉徒弟應該多保重身體，唔好太操勞而捱壞身體。
