話說商務及經濟發展局前局長「肥亨」馬時亨嘅二女馬露玲日前同律師符傑廉到教堂行禮後,一對新人尋晚筵開三十多席,現場布置以新娘子喜愛嘅粉紅色為主色,非常浪漫。由於肥亨曾擔任高官多年,加上喺政商界長袖善舞,除咗一眾新舊高官出席送上祝賀外,政商界大孖沙亦絡繹不絕,非常熱鬧。肥亨話希望出席嘅客人賓至如歸,而未有請到嘅朋友亦要向佢哋致歉。

馬時亨夫婦(左二及一)同囡囡露玲及女婿(右二及一)尋晚宴請政商界好友。

特首CY梁振英於晚上七時四十五分抵達會場,肥亨親自迎接,二人面對傳媒合照數秒後,肥亨稍為停步,但CY繼續向前行因而差啲頭撼頭。除咗CY外,梁班子多名高官都有現身,另外前高官則有前政務司司長林瑞麟夫婦、前財政司司長梁錦松夫婦同前經濟發展及勞工局局長葉澍堃等。

至於政商界出席者亦星光熠熠,除咗多個地產商大孖沙外,英皇集團主席楊受成、行政會議成員林健鋒夫婦、滙豐亞太區行政總裁王冬勝夫婦等人都送上祝賀,由於出席者眾多,恕未能一一盡錄喇!

第一手消息請下載on.cc東方互動iPhone/iPad/Android/Windows Phone Apps