港鐵尋日早上喺中環遮打道舉辦年度盛事「港鐵競步賽」,其中全程一公里嘅主席邀請賽中,港大校務委員會主席「金刀梁」梁智鴻、立會議員謝偉俊同馮檢基、運輸及房屋局副局長邱誠武、前港姐鄭文雅等三十多人參加。大部分人都Hea住行,睇落似「散步」多啲。

梁智鴻(中)着住長褲Hea住行。

謝偉俊一身紅噹噹競步,但未為佢帶來運氣。

張少華(左)力壓邱誠武(右)得第四名。

鄭文雅即使跑輸,但衝線一刻都相當興奮。

邱誠武後勁不繼

大會向每名參賽者派發一件粉紅色運動衫,佢哋大部分都着晒短褲、波鞋,但金刀梁就着住條灰啡色嘅長褲,仲要着埋皮鞋款嘅波鞋,擺明係志在參與,果然沿途慢慢行連競步姿勢都無擺。一向打扮出位嘅阿Paul就着咗條紅色運動短褲配對同色嘅波鞋,同大會件衫襯到絕。

相反邱誠武就搏命得多,一起步已守住第三位,可惜到咗後段開始有啲吃力,衝線時仲喘晒氣,最終得第五名,竟然都攞獎喎!雖然港鐵主席錢果豐同行政總裁韋達成睇落好落力,但實力就麻麻,五名不入。

賽事最終由香港會計師公會主席Keith Pogson奪冠,西醫公會會長楊超發就第二,德勤會計師事務所合夥人蔡永忠就第三,會計師、醫生除咗讀書叻,原來運動都唔錯喎。港鐵人力資源總監張少華就得第四,佢仲蟬聯埋最佳競步姿獎添!

第一手消息請下載on.cc東方互動iPhone/iPad/Android/Windows Phone Apps