政壇：搞搞政：范國威孔令瑜同路人鬼打鬼
新民主同盟嘅立法會議員范國威同民間人權陣線召集人孔令瑜向來係民主路上嘅同路人，但范國威喺上個月一個反盲搶地嘅聯署廣告就惹起孔令瑜把火，佢批評廣告聲明入面「破壞了香港文化秩序」，而「源頭減人」等字眼亦有冒犯內地新移民之嫌，早兩日更公開下戰書要求同范國威當面對質，估唔到兩個「同路人」為新移民反枱鬼打鬼。
設計圖片及對白
孔令瑜尋日以關注中港家庭權利聯席發言人上電台節目批評，雖然聲明冇指明新移民係「蝗蟲」，但對「源頭減人」字眼相當不安，認為范國威唔應該將社會問題嘅責任加諸新移民身上，令佢哋感到被中傷、冒犯，觀感上有「隱性歧視」之嫌咁話，又話「你不殺伯仁，伯仁卻因你而死」，要求范國威澄清事實。
不過，范國威反指孔令瑜含血噴人、亂扣帽子，直言香港唔可能無限量接收新移民，又話從來都尊重新移民以家庭團聚理由申請單程證來港。范國威係咁以「言論廿三條」、「文字獄」反控孔令瑜言論，兩人聯同聯席發言人曾冠榮喺節目鬧交鬥大聲，主持人都冇佢哋符，節目後范國威仲喺社交網站繼續呻，睇怕呢場爭拗唔容易平息。
