政壇：「幫港出聲」揼心口博支持
高舉反對「佔領中環」行動旗幟嘅「幫港出聲」，除早前登廣告同出席論壇對戰佔中人士，之後就冇乜動靜。幫港出聲召集人周融就宣布下月會捲土重來，透過落區「見面求支持」爭取年底前得到十萬人支持，終極目標係得到一百萬港人讚好，方法之一就係向十八區區議會埋手，甚至向區議會正、副主席揼心口博支持。
周融尋日向傳媒透露，目前得到四萬幾人支持反佔中，但發覺過去兩個月不停現身論壇同佔中支持者對壘嘅成效麻麻，唔少論壇得幾十人參加，大部分都係佔中死硬派，佢同佔中三子都開始講到攰，咁樣單打獨鬥都唔係辦法，於是決定搞人海戰術，轉而搵區議會支持，透過落區搞小型照片展覽，展示香港和平同世界動亂嘅強烈對比，畀街坊反思係咪想香港發生動亂喎。
「靠嚇」反佔中係咪行得通真係見仁見智，但向來宣稱獨立無黨派嘅周融，亦發覺冇政黨支持嘅運動實在勢孤力弱，到依家不但冇人力、財力，連個四正啲嘅辦公室都冇，佢歡迎反佔中嘅政黨向佢招手謀合作。至於市民點樣支持，上社交網站讚個好已經計數，相比參與佔中要簽意向書，可以話係簡單啲，話係兒戲又得。
