捲入澳門世紀巨貪案嘅華人置業主席劉鑾雄(大劉),尋日如常健步如飛到灣仔富豪飯堂食晏。之前大熱天時已見佢着住件褸,尋日天氣有啲涼意,佢就改穿厚身外套兼戴住囗罩,問佢係咪身體不適?對官司有冇回應?佢都一概唔答,木無表情匆匆行入飯堂。我哋報道過其保安嘅「霸道」攔路陣勢惹來途人不滿後,雖然之後有所改善,但點知尋日輪到「霸升降機」,唔畀其他顧客乘搭同一部升降機。

劉鑾雄

大劉尋日戴住口罩去食飯,仲搵保安攔住其他顧客,自己霸晒部升降機。

尋日中午十二時許,大劉抵達灣仔富豪飯堂,現場依舊有三名保安做好迎接準備,由於當時下着毛毛細雨,保安即打傘為佢擋雨,直到進入飯堂升降機口為止。由於部升降機未到,大劉背住記者等候,期間有其他顧客想入內搭升降機,保安即向顧客示意稍等一會,待大劉獨自入升降機後,其他顧客就被迫搭另一部升降機上去飯堂。之後大劉母親、妹妹同女友甘比、囡囡秀樺相繼到達飯堂。

憂心官司致病?

大約下午兩點半,大劉家人先行離開,而佢就殿後,但依然戴住口罩,問佢係咪憂心官司所以病咗?問咗兩次佢都不作回應,匆匆上車離去。

第一手消息請下載on.cc東方互動iPhone/iPad/Android/Windows Phone Apps