政壇：陳李妮秘製蟲草飯養顏
身材一向好fit嘅博愛醫院副主席Lily陳李妮，除咗平時飲食好有心得之外，閒時仲鍾意四圍搵好嘢食，佢日前又約埋幾個好友去祭五臟廟，座上客包括「霓虹光管大王」後人譚浩瀚同女友Shirley。當日佢哋去咗楊貫一銅鑼灣間飯店開餐，原來佢係飯店嘅忠實粉絲，經常向阿一偷師絕密廚藝，最鍾意就係學煮蟲草砂鍋飯，只需放三條冬蟲草同白米一齊煲，簡單易做，又夠晒補氣養顏。
陳李妮（右）約埋好友譚浩瀚（左）同Shirley（中）去搵好嘢食。
Lily之所以去幫襯，皆因阿一間飯店租約已於上月底到期，由於捱唔起貴租，所以決定搬到附近嘅商場重新開業。阿一話，舊舖業主同意延租至本月底，事關新舖仍裝修緊，佢擔心食客等太耐冇得食，所以做得一日得一日喎。
