煞掣救車要一放一踩
【本報訊】肇事的士撞車後令煞車系統失靈,有汽車專家表示,撞車時車內的全動系統部分或會撞壞,令汽車難以煞停,司機應保持鎮定,切記不要用腳長踏煞車掣,應以「一放一踏」方式按踏煞車掣、拉動手掣、入「低波」及扭軚將車身擦向牆邊或石壆,盡量令汽車減速或煞停。
可強行入低波
香港汽車高級駕駛協會主席蒙海強稱,車內任何一部分的全動系統如引擎、波箱、飛輪及直軸等如被撞毀,均有機會令汽車「死火」,司機要用多幾倍力才可將煞車掣踩下減速,如在平路中,司機可拉動手掣將車停下。
蒙表示,如汽車在斜路上遇事,司機首要保持鎮定,切記不要用腳長踏煞車掣,反而要以「一放一踏」方式,重複多次按踏煞車掣,用煞車輔助系統內餘下的制動力,盡量拖慢汽車,亦可同時拉動手掣輔助,並可強行入低波,令車輛減速至停下。由於煞車輔助系統失靈時,軚盤會比平時重,司機亦可盡力扭軚,將車身擦向牆邊或石壆,以減慢車速,令汽車停下。