SUN搞作：少膽虫手記：進擊爛果的巨人
「究竟邊個係進擊的巨人？」淫黎一邊拍住個肥肚腩，一邊叫囂，身旁肥豪急急迎前阿諛奉承，「腦細！我哋嘅忠實讀者呀，佢日日寫信激讚《爛果》o架！」假消息一公布，淫黎笑到見牙唔見眼，「快啲，快啲讀畀我聽！」知道淫黎不嬲老花，少膽虫捉緊邀功之機，擸咗封信嚟讀，「爛果萬中無一，堆填區精品之多，磬竹難書！願進擊的巨人早日在壹全霉出現！」擦鞋擦到底，少膽虫讀到字字鏗鏘，隨住淫黎嘅鼻鼾聲此起彼落，辦公室洋溢着溫暖嘅氣息。
「腦腫！磬竹難書即係罵緊我哋呀！」fing春蘇突然加把口，淫黎成隻殭屍咁彈起，少膽虫暗叫不妙，「蘇！你講清楚啲！」「腦細，巨人以食人為樂……」淫黎面色驟變，「咁兇殘，過唔過到網絡23條o架？」少膽虫不禁說漏了嘴：「使乜驚？依家啲傳媒機構，最叻就係自我審查！」淫黎面色好黑咁問：「我好唔開明咩？」少膽虫惟有補鑊：「腦細你好過啞視同屍屍TTB多多聲呀！」
「腦腫，你之前話花仔對鞋易擦啲喎……」fing春蘇再狗噏多次，但見淫黎拳頭緩緩升起，今次弊喇……
