繼雙非孕婦爭床位、奶粉後，最近又爆出雙非學童爭幼稚園學位，一時間，要求政府取回單程證審批權，制訂政策以「港人優先」為大原則嘅倡議相繼出現。由廢官「翻閹」做平等機會委員會主席嘅周一嶽（周一鑊）尋日扮晒正義，聲言要譴責社會歧視新移民嘅言論，話任何人對另一人背景作出中傷嘅言論，都構成歧視。大家千祈咪忘記，導致今日雙非學童困局嘅始作俑者正係周一鑊同「貪曾」前特首曾蔭權爵士呢兩個罪人，周一鑊依家掉轉頭火上加油，真係辣慶好多人。

設計圖片

雙非問題要追溯到貪曾喺○九年推動嘅六大優勢產業，而時任食物及衞生局局長周一鑊都有份主力發展其中嘅醫療產業。佢哋本身諗住搵多啲內地人來港睇醫生，點知搞到內地雙非孕婦蜂擁來港產子，種下今日惡果，佢哋作為政府高官，由數據中已經知道來勢洶洶，偏偏冇人理，罪魁禍首之責，佢哋點卸得到？立法會議員范國威尋日批評，港府喺過去數年都冇嚴肅對待雙非孕婦來港產子及雙非學童問題，所以認為港府應堅持「港人優先」原則，同時制訂新校網嚟處理跨境學童問題。

周一鑊出席活動時就話，雖然依家嘅歧視法例未有保障內地新移民，但相關歧視嘅言論都要受到譴責，尤其係公職人員同議員，更唔應該發表咁不負責任嘅言論喎！

周一鑊講得咁口響，究竟佢有冇自己反省過，有關中港矛盾問題係佢同貪曾種下咁嘅因呢？點解依家要市民承受晒個惡果呢？

第一手消息請下載on.cc東方互動iPhone/iPad/Android/Windows Phone Apps