前高官馬時亨（肥亨）兩年內再度榮升外父，尋日佢嘅細女馬露玲下嫁任職律師嘅男友符傑廉，胞姊馬露明做伴娘，一對新人中午喺中環聖約翰座堂舉行婚禮，明晚喺中環四季酒店擺喜酒。肥亨話既興奮又不捨，咁開心嘅時刻唔想喊，惟有忍住眼淚喺心裏面喊。話雖如此，多咗半邊仔嘅肥亨大讚細女婿踏實上進，畀足一百分，希望女婿同囡囡相愛一生，仲要好似自己咁擴大家庭喎！

馬露玲同男友（右四及三）拉埋天窗，爸媽馬時亨夫婦（左一及二）、胞姊馬露明及丈夫（右二及一）喜上眉梢。

霍建寧夫婦亦有到場祝賀。

唐英年同林瑞麟齊齊攜眷出席。

林瑞麟

肥亨係愛妻之人，尋日更引聖經寄語一對新人：「男人是一家之主，《聖經》說男人是頭，妻子是頸，只要記住條頸支配着頭。」其實肥亨意思係叫女婿聽晒乖女話咋?據知一對新人邂逅於教會內嘅讀經班，雙方一直暗中互相傾慕，後來男方終於鼓起勇氣追求伊人，仲行埋「外父外母政策」。佢哋打算點玩新郎呢﹖肥亨大爆女婿係「車癡」，故出題考對方關於名車嘅知識，笑稱自己似考牌官喎！

唔少政商名人都有到賀，如前保安局局長李少光、發展局局長陳茂波、即將卸任嘅醫管局主席胡定旭、和黃集團總經理霍建寧夫婦、金融發展局主席查史美倫等，兩位前任政務司司長唐英年、林瑞麟齊齊攜眷出席，只係二人冇乜交流。

第一手消息請下載on.cc東方互動iPhone/iPad/Android/Windows Phone Apps