政壇：陳克勤工作報告好熟口面
新界東居民最近開始收到立法會議員陳克勤嘅工作報告，驟眼睇份報告嘅封面設計同某份免費報章封面好相似，惹來抄襲、侵犯版權嘅質疑，結果克勤要為引人誤會表示唔好意思，再三強調工作人員派發時一定會講明係議員工作報告。
克勤解釋，佢哋一向都係製作傳統正方形嘅工作報告，但近年見到免費報章概念幾成功，所以最近製作工作報告時就叫設計師參考吓，最終面世嘅工作報告封面就搞出個大頭佛。而工作報告嘅內容則參考並集各家之大成，好似佢開設咗名為「勤觀點」嘅欄目，趁機向居民表達對各個熱點議題嘅意見，另外有圖文並茂嘅漫畫，好似最新一期就係講述佢身為立法會政府帳目委員會成員，有份參與公審「貪湯」前廉政專員湯顯明嘅一問一答等，希望帶畀居民新鮮感喎！
