政壇：買樓排長龍阿Paul氣憤
有新樓盤尋日加推貨尾，仲以回贈買家印花稅（BSD）利誘，結果吸引幾千人排隊，到場者仲要抽籤，唔一定買到。有份審議BSD嘅立法會議員謝偉俊（Paul）尋日都去碰運氣，阿Paul買樓經驗無數，但以往都用公司名義買，家陣BSD生效，焗住第一次以個人名義買樓。但尋日抽唔中籤，只能安慰自己慳番千幾萬。
樓市淡靜咗一輪，當有發展商話回贈BSD後，吸引大批買家，連負責審議BSD嘅阿Paul都被吸引。阿Paul話預咗擲過千萬元入市，因睇好樓市前景，點知去到先發現幾千人排隊，估唔到奉獻「第一次」要等咁耐。
最終樓就買唔到，但依然一肚氣，阿Paul狠批發展商安排不周，夾硬要幾千人打蛇餅排隊，又唔同人講等幾耐，懷疑發展商想借買家造勢。阿Paul話既然發展商無當班買家係人，買唔到樓都無蝕底。
