政壇：梁智仁要剷走「山頭」
醫管局主席換人在即，候任主席梁智仁未上任已聽到好多希望及要求，微生物專家兼香港公共醫療醫生協會會董何栢良尋日都講埋一份，何栢良喺電台節目中表示，醫管局聯網山頭主義嚴重，其他如公共醫療求過於供、醫生工作量不斷增加以致醫療事故頻生，最後形成醫生逃亡潮等惡性循環都要解決，自爆曾是梁智仁學生嘅何栢良大講對當年老師嘅睇法，又讚梁智仁係「重量級」嘅人士，希望老師上任後可解決醫管局嘅重量級問題。
設計圖片及對白
何栢良敬重恩師
何栢良喺節目中坦承，以前讀醫科時都做過「逃學威龍」，仲話自己係個經常走堂嘅頑皮學生，但唯獨梁智仁嘅課堂佢會百分百出席，事關身為骨科教授嘅梁智仁授課冇悶場，又夠威嚴，可以活用病例深入淺出咁教書，同學都對梁教授又敬又畏。
講到梁智仁獲委接掌醫管局，何栢良力數醫管局嘅問題，尤其係聯網醫院嘅山頭主義已經影響及公共醫療服務，譬如同一病症喺唔同嘅聯網有唔同嘅輪候時間，有啲甚至可以相差十倍；而公共醫療求過於供，致前線醫生工作壓力太大，五年中有超過八百個擅長處理複雜病症嘅資深醫生離開等，各種問題已經響起警號。佢更話，梁智仁上任後重中之重係提升醫管局嘅管理質素，杜絕山頭主義，做到人盡其才。一句講晒，呢個當年嘅學生依家以醫管局同事嘅立場向前老師開列一串艱難任務清單。
最後何栢良引用英國前首相邱吉爾嘅名句，鼓勵新主席與同事樂觀面對困難：「悲觀主義者在每個機會中看到困難，樂觀主義者在每個困難中看到機會。」
