前廉政專員湯顯明貪杯好酒,敗壞綱紀,因而贏得「明顯劏」嘅罵名。其實佢嘅契兄前特首曾蔭權爵士仲厲害,唔只沉醉美酒,仲私吞公家美酒添,如果要幫佢改花名,呢個應該最啱佢嘞:「明顯貪」!

嗱,貪曾嘅貪婪係人都睇得出o架。佢早前被踢爆喺臨卸任前兩年豪花二十六萬元公帑購入二百幾支酒,但係最後到底飲咗幾多,剩低幾多,外界一無所知,只有天知、地知、貪曾自己知。更離譜嘅係,貪曾一邊瘋狂買酒,一邊瘋狂毀滅證據,申訴專員公署調查揭發,回歸以來十五年嘅特首辦存酒紀錄已經被全部銷毀。你話嘞,貪曾唔係心有鬼,使乜毀屍滅迹吖?

所以咯喎,有政黨尋日到廉署總部請願,要求徹查貪曾涉嫌以權謀私,私吞酒品。舉報人係咁講嘅,特首辦冇保留存酒資料,令外界無法查察貪曾嘅紀錄,而東方報業集團曾經踢爆貪曾去年六月臨卸任前,將大量茅台烈酒搬離禮賓府,質疑有人濫用職權,將公家美酒據為己有。簡單講,即係懷疑貪曾貪婪成性,公酒私用,以公肥私,破壞本港嘅廉潔與法治,叮!

正所謂,酒逢貪官千杯少。貪曾平時連菜心、肥雞都唔放過,對住貴價名酒點壓抑得住貪欲吖,梗係擸得就擸,貪得就貪啦。之不過咁,酒翁之意不在酒,貪曾擸擸埋埋咁多靚酒,未必只係為自己獨歎o架,話唔定仲會用嚟款待「曾朋友」,繼續以酒會「友」編織「曾商勾結」貪腐網絡。係呢,你估共醉之人知唔知啲酒可能係賊贓吖嗱?

講到呢度,太一叮又係時候問一問廉署。喂,貪曾私吞酒品證據確鑿,你哋唔會又係放軟手腳,闊佬懶理吖嘛?政黨伸張正義舉報貪官,你哋唔會又係視若無睹,助紂為虐吖嘛?須知道,廉潔同法治係香港嘅核心價值,若然廉署繼續縱容貪官,坐視貪腐,唔好話廉署招牌不保,香港嘅廉潔同法治招牌亦遲早摺埋o架!

講開又講,貪曾貪威識食,唔止鬼鬼祟祟私吞美酒,更加同富豪勾勾搭搭食大茶飯,廉署足足調查咗一年半有多咯喎,幾時至有結果呢?嗱嗱嗱,你哋唔好話調查貪曾嘅資料同啲公家美酒一樣不知所終呀,市民唔放過你哋o架。

咁講啦,貪酒不離「曾兄弟」,廉署查貪曾,不如同貪湯一齊查,話唔定會有突破性發展o架,叮!

第一手消息請下載on.cc東方互動iPhone/iPad/Android/Windows Phone Apps