SUN奇古怪：SUN潮語：【內交】
「內交」呢個真係潮語，因為呢個詞彙都係去年特首上任之後先有，古今中外國家政要元首從來無人講過「內交」呢樣嘢，真係可謂聞所未聞。有別於外交、邦交、結交、嗌交、打交、性交……「內交」嘅意思係「與中國內地結交」咁解，特首提出香港應與內地城市多多交流，發展互惠互利嘅互動關係，發揮香港背靠祖國嘅優勢，此為香港未來發展嘅重點。「內交」的確係香港特有，因為香港本來係殖民地，主權移交之後，就成為中國一部分，香港同大陸其他城市分隔咗160年，自然要重新「交」過。
2010年菲律賓人質事件，係香港人一個永遠不能磨滅嘅傷口。三年後嘅今日，菲國政府依然對香港人一句道歉都冇，更遑論賠償死傷者。近日特區政府終於因為要開國際會議，而有機會同菲律賓總統阿基諾三世會面，同佢面對面講數討論人質事件，結果係點？咪同今屆特區政府所有工作一樣，又搞出個大頭佛，再一次令香港淪為笑柄。呢次會面到底係菲國方面立心矮化香港？定係特區政府做慣奴才自甘墮落？特首辦無清楚交代。最令人谷氣嘅係，李克強總理想同香港人出頭，同菲國總統交涉嘅時候，阿基諾三世竟然話特首已經同意「放低（Put Behind）」事件！不過，從呢件事情嚟睇，特區政府嘅「外交」手段，查實同菲律賓警察嘅LEVEL都係相差無幾，唔怪得之梁特首唔搞「外交」搞「內交」！
特首雖然一廂情願想同人哋「內交」，但係人哋肯唔肯同你「交」呢？好似上海新搞咗個學足香港嘅自由貿易區，擺明車馬想同你爭一日之長短，加上特首上去同人「內交」時嗰種「人哋係兄，自己係弟」嘅姿態……所謂「內交」，似被人搞多啲。
