政壇：搞搞政：陳維安捲立會鵝肝疑雲
鵝肝搞出大頭佛！有網上媒體尋日質疑立法會午宴點解有鵝肝食，事件引來一班議員追問秘書長陳維安（Kenneth），搞到佢要喺尋日下晝嘅內務委員會解釋，事件只因立法會嘅嘉賓午宴菜單上有呢兩個字，但唔係菜式有鵝肝同魚翅呢啲貴價食材，而係立法會其中一間食品供應商嘅名稱有「鵝肝」兩個字啫！
設計圖片及對白
立法會其中一間新膳食供應商係鵝肝專門店，Kenneth話，呢間新膳食供應商個名有「鵝肝」兩個字，但當日佢哋嘅菜單係無鵝肝嘅。有議員就話，食鵝肝有殘害動物權益之嫌，雖然如Kenneth所講「鵝肝專門店冇鵝肝」，但因為觀感問題，建議搵過第二間。點知劉慧卿聽到就話，依家咁多人食齋，不如立會都搞食齋啦！
另外，議員馬逢國同何秀蘭就提出，有人質疑作為立法會新膳食供應商嘅馬會為立法會提供特別優惠，有利益輸送嫌疑。Kenneth就話，秘書處已經搵咗唔止一間私人會所報價，但最後只得馬會回覆，至於用邊間佢哋最終都係會聽議員意見嘅。
