政壇：夏千福「潛水」買水壺
做人最緊要安分守己，履新冇耐就對香港政制問題說三道四嘅美國駐港總領事夏千福，遭外交部同港府官員鬧到冇晒面後，近日「潛水」絕迹社交網站。上周末見佢同一位外籍朋友喺上環水坑口街一間知名嘅傳統雜貨舖買嘢，着住Polo恤嘅夏千福神態輕鬆，同朋友有講有笑。
夏千福（右）同孭背囊嘅外籍朋友有講有笑。
夏千福一向鍾意打親民牌，經常喺領事館官方社交網站上載自己嘅遊蹤，但係自從被外交部駐港特派員宋哲公開警告後，佢近兩星期已喺網站上「失蹤」，最新一次係上個月二十七日去澳門舊基督教墳場拜祭首任駐港總領事Thomas Waldron。不過，上周末下晝三點零，我哋就見到佢喺上環一間門口掛滿傳統家庭用品嘅雜貨店出現，又喺店內仔細端詳足足二十分鐘，最後買咗個舊式水銀膽暖水壺，盛惠二百九十八元。呢間舊式雜貨舖已開咗近六十年，已經係第二代經營，好多外國遊客亦慕名到來尋寶。
