政府三名政治助理莫宜端、何建宗同張秀麗相繼跳船後，原本諗住發展局同商務及經濟發展局搵到副局長可為梁班子打氣沖喜，但政治總係波譎雲詭，政圈前日突然傳出有某副局長決定「跳船」辭職，令政府上下紛紛猜測邊個係最新「跳船者」。

翻查資料顯示，十二個政策局之中，撇除公務員事務局本身無副局長一職，有九個政策局都有副局長，綜合各方消息估計，「跳船」疑似高危人士分別係財經事務及庫務局副局長梁鳳儀，以及環境局副局長陸恭蕙。梁鳳儀接受查詢時，第一個反應係問點解有咁嘅傳聞，再三追問佢會否短期內離任，佢未有一口回絕，僅重申「總之唔係我」。而接近陸恭蕙嘅人士亦代為澄清，表示佢「唔會轉工、唔會跳槽、亦無人搵佢過檔」喎。

第一手消息請下載on.cc東方互動iPhone/iPad/Android/Windows Phone Apps