前政務司司長唐英年(唐唐)喺去年特首選舉落敗後,生活似乎歸於平淡,除咗外遊,只係有時見佢去中環買吓咖啡。不過,佢尋日竟然喺香港友好協進會安排下去咗間中學,表面話同校內百幾名學生講中港兩地關係,但似乎喺度講風涼話。佢話自己在任財政司司長時,面對經濟低迷都堅持唔減削教育、福利及醫療開支,又話社會福利唔係單純派錢,而係要刺激經濟、創造就業喎。

唐英年去中學演講,但內容有啲似係風涼話。

唐唐講咗咁多,好似任內真係做咗好多咁,可惜佢似乎忘記咗,唔少工作都係佢之前任財政司司長梁錦松一早種下嘅種子,早就削減開支,佢先至有收成,呢啲叫前人種樹,後人乘涼。此外,唐唐仲借自己去南極嘅體驗訓勉同學,話喺當地深深體會到「團結就是力量」嘅道理喎。因為企鵝為應付嚴寒會聚成一大群以及一個圓形,等外層企鵝負責擋風,內層負責保護小企鵝,定時就更替崗位咁話。

第一手消息請下載on.cc東方互動iPhone/iPad/Android/Windows Phone Apps