新民黨立法會議員田北辰（田二少）近排有煩惱，皆因佢嘅無間道前助理趙恩來（阿來）過檔工黨後，唔單止想參選二○一五年區議會選舉荃灣愉景選區硬撼田二少，據聞佢仲聲稱要揭舊老闆（田二少）嘅黑材料添！不過，喺泛民主派協調下，阿來似乎已經冇乜機會出選愉景選區，有消息話阿來或轉戰荃威選區，如真有其事，又好大機會搞喎田二少區選部署。

據聞田二少都計劃派出愛徒李維出戰荃威選區，挑戰現任獨立議員林婉濱。不過，建制派內部都有參選協調機制，最後係點暫未知。

講開又講，立法會發展事務委員會前日開會訂定本年度議程同會期，最後一次會議定於明年七月中旬，有議員質疑點解最後一次委員會會議要安排遲過大會開，擔心到時可能會唔齊人開會。

議員陳偉業（大舊）聽到後立即扯火，大鬧啲議員「新貴」話：「七月初放假？返去瞓啦！」其實呢個話題討論時，議員們你一言我一語，搞到好混亂，結果大舊口中嘅「新貴」就被誤會咗係田北辰，但實情係葉國謙提出唔想咁遲開會，所以返去瞓嘅應該係阿謙！

第一手消息請下載on.cc東方互動iPhone/iPad/Android/Windows Phone Apps