政壇：馮煒光破釜沉舟博做IC

新聞處內部異議大

前IC鄧惠鈞因病辭職之後，梁班子好耐都未搵到人，依家馮煒光接任消息傳出後，輿論卻呈一面倒。有官場中人話，政府內部好少人知馮煒光接任IC呢個消息，而政府新聞處（GIS）中人嘅異議幾大，據聞有人想像吓如果呢個有權點佢哋做嘢嘅人加入，就會有反彈情緒！

去年因為應徵副局長而退出白鴿黨後，馮煒光就專心搞公關公司，可惜早幾日佢哋公司搞藝發局選舉卻搞到一鑊粥，呢個關鍵時刻出事，難怪外界對佢接任IC大打折扣喇。有網民更翻馮煒光競逐區議員嘅舊帳，話佢兩年前喺區議會選舉論壇，質問其餘三個候選人，話有個別組織區議員做做吓辭職加入政府，點樣說服選民覺得佢有承擔呢？怕且佢都要睇番呢段片，再諗諗仲有冇面返去見海怡嘅江東父老喇！

點都好，外界質疑聲多多，馮煒光仍然一副此心只向官場嘅款，據講，上月至本月初，佢分別辭任其公關公司嘅董事，又將佢間公司「馮煒光顧問有限公司」向公司註冊處撤銷註冊，擺到明就要將私人利益切割，免得入到政府遭人挑戰。「防風措施」做到足，但臨門一腳嘅結果真係冇人知。政壇消息就話，其實馮煒光私下講過，佢個區議會議席會留畀前黨友，而其他泛民黨派亦對佢個位虎視眈眈。換言之，佢同議席鐵定拜拜，又唔玩公關公司，一心攀門常開發言人嘅高枝，掂唔掂？好快揭盅啦。