烏蠅邨觸目驚心 烏蠅官尸位素餐
香港欠缺特色景點，家陣終於發市嘞，嗱，香港唔止會多一個漫畫主題遊樂設施「鐵甲奇俠總部」，仲多咗三條烏蠅邨添，講驚嚇恐怖過《大白鯊》，講核突惡心過《異形》，若然遊客見到，保證大開眼界，畢生難忘吖！
呢三條烏蠅邨分別落戶屯門嘅良景邨、蝴蝶邨同三聖邨，市民想先睹為快，唔使買門券o架，成千上萬嘅黑蠅兵團隨處可見，不分晝夜「蠅」造驚嚇氣氛。就講良景街市吖，攤檔上嘅豬肉、魚鮮、蔬果同雜物布滿烏蠅，衞生堪憂。有檔主以烏蠅膠紙防守，點知膠紙呢頭掛上去啫，嗰頭即刻黏滿過百隻蠅屍，見到都想嘔。
屯門居民聞蠅色變，街市檔主怨聲四起，點算好呢？查實，三條邨由領匯管理，驅蠅重責梗係落喺領匯身上啦。點知領匯貫徹狗苟蠅營嘅營商宗旨，唯利是圖，冇利即逃，三條邨唔係遊人如鯽嘅搵錢商場吖嘛，於是闊佬懶理逃避責任，對蠅患視若無睹，結果畀檔主及居民爆鬧：乜都冇理！
講到呢度，太一叮諗起一個古仔。漢廢帝劉賀夢見有烏蠅堆積宮殿西門台階之側，醒來着大臣解夢，大臣直諫指蒼蠅託夢，以蠅類堆積警寓群小亂政，勸佢勵精圖治，遠小人，親賢臣。可惜，劉賀聽咗當耳邊風，繼續荒唐度日，結果做咗二十七日國君就畀人廢咗，成為中國史上最短命皇帝之一。嗱嗱嗱，古今對照，心「領」神「匯」，家陣烏蠅兵團堆滿屯門鬧市，好明顯就係群小禍政之象啦，一個領匯管理失當，一個食環署監管失職，雙懵合璧，為禍社區，所以咪搞到蠅患無窮、百姓受害囉。
叮佢個鎯鎯，港產官僚真係靠害o架。正所謂，蒼蠅不叮無縫嘅蛋，屯門陷於蠅禍，講到尾就係環境衞生惡劣造成。正如專家話齋，肆虐居民嘅係家蠅，鍾意喺垃圾堆、污水、穢物生長，估計蠅災源頭係鄰近嘅稔灣堆填區。喂，堆填區究竟係保護環境定污染環境o架，滲漏污水不特止，仲製造烏蠅，後知後覺嘅環境局唔該速速補鑊吖！
唔使蒼蠅託夢，大家一清二楚，香港之所以驚現三條烏蠅邨，皆因人類懶蟲界裏面有三隻大烏蠅，第一隻叫領匯，第二隻叫食環署，第三隻叫環境局。
家蠅係播菌之源，烏蠅為患可大可小o架，港產官僚仲唔速速諗計驅蠅，小心畀人當烏蠅咁拍打吖，叮！
