城中鏡：吳傑莊細數中山威水史
喺本港政商界當中，除咗多潮州同福建名人外，有三十幾萬人嘅「中山幫」都名人輩出，好似保安局前局長李少光、中華總商會榮譽會長蔡冠深、導演高志森都係中山人。香港中山青年協會榮譽主席Johnny吳傑莊就夥拍中山市政協Jacko李有全，本月中喺黃大仙舉行首個中山節，運嚟多款中山美食包括杏仁餅同黃圃臘味等派街坊。
中山人吳傑莊（左）同李有全（右）大讚石岐乳鴿好味。
Johnny話中山文化特色多，今次中山節，內地一支近三百人組成嘅「舞醉龍」隊伍都專程來港，仲有「沙溪鶴舞」、表現山歌風情嘅「鹹水歌」表演等。不過，若要數中山之最，就係身為奧運火炬生產地，同埋黃色巨鴨Rubber Duck製作地。另外，多款巴西世界盃紀念品，如鎖匙扣、開瓶器等，亦喺中山製造，佢哋會將呢啲威水史帶畀港人細閱。
講到中山美食，Johnny至愛脆肉鯇、荔枝柴燒雞等；Jacko就鍾情石岐乳鴿，佢話六歲開始已喺爸爸開設嘅酒樓食乳鴿，稱得上係品鴿專家。
