城中鏡：垂直馬拉松 ICC終極一戰
垂直馬拉松世界巡迴賽嘅世界冠軍將會喺香港誕生！平時見嘅馬拉松係向前跑，呢次係向上跑，換言之，夠晒高嘅高樓大廈至有資格做比賽場地，新鴻基地產旗下嘅環球貿易廣場（ICC）就夠晒高嘞！
郭炳聯喺啟動禮上表示，今年比賽面向國際。
新地主辦嘅慈善賽「勇闖ICC-100」尋日舉行啟動禮，新地主席郭炳聯身兼活動籌委會主席，佢話今年比賽面向國際，成為垂直馬拉松世界巡迴賽終點站。
今年垂直馬拉松世界巡迴賽跨越美國、瑞士、西班牙、台灣同北京等摩天大廈，而香港站嘅ICC將會係終極一戰！活動會由ICC嘅8樓做起點，總共跑八十二層、一共二千一百二十級樓梯，係八個巡迴賽站中梯級最多嘅一站！今年除咗有「精英賽」、「個人賽」、「企業隊際接力賽」之外，更新增「滿FUN體驗」活動，只要年滿十六歲即可報名參加，旨在體驗喺香港最高嘅建築物中步行，不求名次，希望可以吸引到一家大細參與。
