城中鏡：黄林碧瑢母女檔 搞慈「膳」賣物會
好寧靜嘅大潭道陽明山莊喺啱啱過去嘅禮拜日變得好熱鬧，事關佢哋又再舉行慈善嘉年華幫「膳心連基金」籌款。基金創辦人Vanessa黃林碧瑢同三個女齊出動，佢哋一時喺攤位擺賣、一時張羅舞台表演，期間不停招呼專程上山去捧場嘅好友，忙到冇時停。黃家大小姐黃蕊蘋孭住部相機、戴上草帽同黑超做大會攝影師，十分搶鏡。
黃家老大蕊蘋（左一）、老二巧芸（左二）、老三采笛（右一）同表弟歌手林利豪（右二）齊齊搞熱氣氛。
黃林碧瑢（右）同基金副主席劉懿玲拍住上幫人「除飢困，展笑容」。
林斯亮（右）同太太Sophia（左）帶埋一對寶貝女兒，做善事過家庭日。
歌手姪仔飛來助陣
當日花園平台擺滿幾十個攤位，售賣物品包括衫鞋、手工藝品同食物，琳琅滿目，現場仲搭咗個舞台做表演，好多小豆丁跑上跑落，歡笑聲不斷。救心代理商泰山企業老闆林添茂囝囝Erik林斯亮亦喺度擺檔，佢哋唔止係山莊嘅住客，而且同Vanessa一樣係台灣人，梗要出錢出力支持啦。
Erik原本從事金融業，依家返公司幫手，仲將爸爸嘅生意發揚光大。近期佢睇好BB市場，引入德國知名有機嬰幼兒食品，大受歡迎，尤其係奶粉。台灣「最帥宅男」歌手林利豪亦到場獻唱，原來佢同黃家三姐妹係表姐弟。Vanessa笑笑口咁話，姪仔係參加台灣選秀比賽脫穎而出嘅實力派歌手，所以特登叫佢跨海嚟助陣。
Vanessa又話膳心連近期將再添購兩部車，以便將溫暖嘅菜飯盡快分送畀受惠者。十二年前，身為陽明山莊創辦人黃週旋新抱嘅Vanessa，見酒店食肆大量丟棄新鮮食材好浪費，於是由山莊會所餐廳開始，展開回收食物轉送貧困人士嘅行動，令惜食觀念漸漸普及化。
