政壇：搞搞政：莫乃光煲爛冬瓜丟架
立法會准許議員用三文兩語發言，資訊科技界議員莫乃光尋日向商務及經濟發展局局長蘇錦樑質詢，問有關無綫電視被罰款九十萬元一事，期間佢特登用「煲冬瓜」（普通話）發言，先批評通訊管理局係「冇牙老虎」，然後又質問究竟無綫「給了錢沒有？」當時連負責做手語的即時傳譯員都呆咗，似乎唔知佢講乜。蘇錦樑好坦白話聽唔明，叫佢問多次，佢惟有講番廣東話，呢鋪佢真係搵石頭揼自己對腳喇！想寸人點知煲爛冬瓜，丟晒架！
設計圖片及對白
反映無綫藝員慘況
之後莫乃光解釋，話自己普通話水平麻麻，但因為唔少藝人都被壓迫講普通話，所以佢咁樣做係反映無綫一般藝員嘅慘況。究竟呢啲算唔算「行為藝術」呢？至於另一位經常被質疑語言能力嘅新丁鍾樹根，由於佢係香港大學校董，咁啱最近港大委任外國人馬斐森做新任校長，唔少人都擔心樹根嘅英文根基唔掂，將來開校董會點算好？
樹根尋日主動解釋疑團，話港大校董會會議一向都用英語，徐立之年代都係咁啦，佢未試過聽唔明一粒字，仲強調自己讀番書，點會唔識英文呀？有記者建議佢試吓喺立法會以英語發言，以示英語有幾掂，點知佢話自己講咩語言，係視乎對咩人，無理由對住中國人都講英文咁怪喎。佢最後補充，話如果有人質疑佢英文唔掂，可以私下考佢喎！
