政壇:低頭族大輝拇指發炎
依家好多低頭族,即係無論搭車、行街都耷低頭篤智能手機,早前有好多調查指出,話用智能手機用得多,打機又好、send訊息又好,總之用得多嘅話,頸部同手指好容易勞損,原來立法會都有一個人辦。
因為成日用手機打電郵同傳短訊,大輝左手拇指發炎。
廠商會喺立法會嘅代表林大輝平時去到邊都攞住部黑莓手機,但佢尋日就換咗另一款智能手機,莫非趁新會期換新機?大輝解釋話因為早前不斷用左手拇指打電郵同傳短訊,結果搞到拇指發炎,有時仲成隻拇指屈唔埋。
佢之後向食物及衞生局局長高永文請教,對方建議佢一係切咗左手拇指上已經壞死嘅肌肉,一係就打類固醇控制病情。
佢一聽到個「切」字就即時耍手擰頭,寧願打針改善拇指病情,依家仲索性換手機兼改用右手打電郵同短訊,避免病情繼續惡化落去喎!
咁搞法,會唔會醫好左手拇指,又輪到右手拇指遭殃o架?