政壇：莫斯科展覽港用簡體字
之前曾有多個本港商戶因為只用英文同簡體字，唔用繁體字，畀人投訴，最後惟有用番繁體字以平息風波。估唔到特區政府竟然冇吸取教訓，喺莫斯科舉行嘅「香港巡禮」展覽中採用簡體字，唔通連政府都鼓勵「棄繁從簡」﹖
特區政府喺莫斯科舉行嘅「香港巡禮」展板用咗簡體字。
特區政府嘅「香港巡禮」展覽喺國家文化部同駐俄羅斯聯邦大使館協助下，尋日起喺中國文化中心舉行，民政事務局局長曾德成仲特登飛去俄羅斯主持開幕禮。為期個幾月嘅展覽旨在介紹香港各種特色同文化，包括維港、香港街道電車、地質公園同港產電影、粵劇等。
不過，似乎個展覽就忽視咗香港係用繁體字嘅地區呢個特色，竟然「以簡代繁」，喺展板中使用簡體字。好似喺展覽嘅大型背景板中，「見面．見香港」個見字、「文化遺產」嘅遺產兩個字都寫晒簡體。係政府冇吸取教訓，定係諗住香港市民唔會去到莫斯科抗議呢？
