政壇：麥齊光低調做港大嘉賓
被控騙取租金津貼嘅發展局前局長麥齊光，月前被定罪獲判緩刑後，行蹤一直都好神秘，只知道佢已就定罪提出上訴。身為香港大學校友嘅麥齊光，尋日低調現身港大名譽院士頒授典禮，佢似乎刻意等來賓入晒場至到埗，仲刻意坐喺禮堂最後排位置。唔少嘉賓離開嘅時候，先至發現呢位久未露面嘅校友都喺度，紛紛上前握手問好，佢亦報以微笑回應。
麥齊光（中）刻意坐喺禮堂嘅最後排位置，嘉賓離開時至發現佢嘅存在。
現場所見，麥齊光同在場嘉賓有傾有講，又主動同獲頒榮銜嘅名人握手祝賀。佢精神明顯比判刑之前好咗，表情亦從容不迫，唯獨係對住攝影鏡頭有啲避忌，始終都冇企定定同人合照，莫非係佢喺案件審訊期間日日被記者圍住，搞到有陰影？
記者上前同麥齊光打招呼，佢隨即攞咗張邀請卡出嚟，話自己係前年獲頒授榮銜者，今次以嘉賓身份出席。問到近況如何，佢話暫時仲喺港大兼職做講師；至於上訴進度點樣，佢只係話：「一路都做緊，冇咩特別。」之後喺散場後迅速走人。
