政壇：籌款晚宴助內地村童圓夢
知識改變命運，想脫貧就更加要讀書。《閱讀．夢飛翔》文化關懷慈善基金為籌募經費，幫內地農村學校興建圖書館同推行閱讀教育，早前舉行「書海翱翔夢飛揚」慈善晚宴，邀請咗民政事務局副局長許曉暉、立法會教育界議員葉建源、湖南省海外聯誼會理事暨副秘書長余大紅、立法會前資訊科技界議員譚偉豪，以及香港菁英會榮譽主席白富鴻主禮。
《閱讀．夢飛翔》文化關懷慈善基金主席梁偉明（箭嘴示）同一眾嘉賓以及嚟自湖南雙峰縣嘅學生合照。（受訪者提供）
基金主席梁偉明喺晚宴期間，報告基金過往工作，並簡介未來發展。當晚大會仲邀請咗湖南省婁底市雙峰縣教育代表團出席，分享佢哋農村學校嘅情況同對基金工作嘅睇法；而一班嚟自受助農村嘅內地學生，仲即場以圖書館推介同話劇表演方式，展示佢哋接受閱讀教育薰陶嘅成果。
賓客踴躍捐輸
之後基金閱讀大使潘芳芳就分享佢對閱讀教育嘅睇法，呼籲台下賓客多多捐輸，以幫助內地農村小朋友圓夢。晚宴籌委會主席李明斌話，要特別多謝各界捐助同捐贈拍賣品。當晚眾人熱烈競投，氣氛激烈，順利為基金籌得四十六萬元善款。
