政壇：李梓敬專幫大佬戥腳

香港大學政治及公共行政學會尋日搞咗個時事論壇，討論上海成立自由貿易區，香港可以點樣保持優勢，李梓敬獲邀成為座上客。據知李梓敬喺黨內主理本地經濟同勞工議題，上海自貿區同李梓敬有乜嘢關係？

同長毛戴耀廷開火

原來班同學仔本來預咗富貴黨田北俊、新民黨田北辰等傳統商界大佬出任講者，但佢哋都以立法會復會為由請同學仔食檸檬，難得李梓敬抵諗，頂咗個論壇嚟做，就上海自貿區呢個同自己風馬牛不相及嘅話題，同「長毛」梁國雄開戰。

事實上，李梓敬唔係第一次幫黨大佬以至整個建制派「戥腳」，好似早兩個禮拜就代表建制派上陣，就「佔領中環」挑戰佔中發起人戴耀廷同支持佔中嘅立法會議員陳家洛，之前亦曾就「雙非」爭議同法律界人士對壘，總之出席唔同論壇就笠唔同嘅帽，成為極速上位另一新招。李梓敬笑言，佢同青年建仔主席周浩鼎都係城市論壇出身，唔介意黨內多啲搵佢哋兩個戥腳。

本來個論壇仲有熱血公民成員「皇上」黃洋達，可惜皇上「龍體違和」突然因發燒甩底，成個論壇就由李梓敬對戰長毛，可惜論壇上二人自說自話，長毛更幾度離題，甚至將話題扯到去政府早前建議但過唔到立法會嘅「五司十四局」，認真九唔搭八。