雙非亂象陸續來 官僚無能必成災
教育局局長吳克儉被人叫做「唔得掂」，真係名副其實。佢上任一年幾，撞板多過食飯，推行國民教育唔掂，處理北區小一派位唔掂，家陣連幼稚園派表都爭崩頭，搞到家長怨聲載道，中港矛盾愈演愈烈，你話佢有邊樣嘢搞得掂吖！
尋日教育局同北區幼稚園代表開會商討改善收生安排，業界認為應該容許家長上網下載表格，不設派表限額，並以就近入學原則收生，優先考慮原區學童。
可惜吖，會就開咗喇，問題依然未解決。呢，有北區幼稚園新學年只收二百幾人，結果派咗一千三百幾份報名表，六個人搶一個學額，唔爭崩頭至奇喇。正如有學者話齋，當局嘅建議大都虛無縹緲，而且遠水難救近火，尤其係所謂統一派位，根本唔可行，事關本港幼稚園屬於私人市場，冇可能照搬小學派位。即係話，教育局連開會補鑊都補唔掂，問你服未。
講開又講，雙非問題引發幼稚園收生混亂，前朝政府固然係始作俑者，現屆政府同樣難辭其咎。吳克儉淨係識得強調學額充足，叫家長唔使擔心喎。但實際上，全港K1學額只有約八萬個，而前年出生嘅嬰兒有九萬五千個，其中雙非兒童三萬五千個，如果佢哋明年全部來港讀幼稚園，仲差一萬五千個學額，吳克儉擘大眼講大話。最弊嘅係，大部分雙非兒童集中喺北區返學，有乜法子唔七國咁亂吖。
雙非問題剪不斷，教育亂象理還亂。有人建議當局推行「港人港校」，畀本地學童優先入讀幼稚園喎。其實，雙非兒童持有香港身份證，係如假包換嘅香港人，根本冇可能限制佢哋來港讀書。
所以話，一切都係前朝政府埋下嘅禍根，貪曾好大喜功，將雙非兒童視為香港人口生力軍，對內地孕婦來者不拒，結果生力軍蜂擁而至，而當局又冇推出配套措施，搞到幾乎陸沉。現屆政府話就話要撥亂反正，點知甩甩漏漏，反而衰多幾錢重。嗱，內地人炒高樓價，就推出港人港地；水貨客搶購奶粉，就推出港人港奶；家陣幼稚園爭崩頭，又有人建議推行港人港校，咁搞法，自由港隨時變成限制港都似！
咪話太一叮唔提醒，雙非問題後患無窮，幼稚園收生亂象只係序幕嘅咋，如果港府一味見招拆招，小修小補，點只唔得掂，遲早冇碇企添吖，叮！
