城中鏡：李鋈麟輸高球飲到醉
東華三院為安老服務籌募經費，今個月將與觀瀾湖合辦高爾夫球慈善大賽。活動籌委會主席李鋈麟話高球係一種益智嘅運動，除咗喺球場漫步可以鍛煉腳骨力，清幽嘅環境更有助思考，所以佢都好熱愛呢項運動，走訪歐亞多國嘅高球場一嘗揮桿嘅樂趣。雖然李鋈麟接觸高球經已十多年，但論球技都係麻麻地，仲試過輸波輸到不省人事添!
李鋈麟曾於新加坡輸波罰飲酒，飲到不省人事而無法完成賽事。
曾家葉對高爾夫球嘅熱愛有九十九分。
李鋈麟話有一次喺新加坡打球，佢嘅朋友就訂立一條規則，就係每一個洞嘅落敗者都要罰飲啤酒一罐。當比賽至尚有兩個洞就結束時，佢已醉倒當場，原來佢當日嘅運氣相當不濟，連灌十六罐啤酒，醉到無法完成賽事。佢又話高球看似悠閒，但落場之前都要做足熱身動作以免受傷，佢就試過未有充分熱身，導致扭傷腰肌。
至於東華三院總理Alec曾家葉，就係另一位鍾情高球嘅男士。佢話自己愛好陽光與綠茵，所以對高球嘅熱愛有九十九分，但佢太太就好少陪佢打波，因為女士怕曬喎。對於高球發燒友都好關心嘅粉嶺高球會問題，Alec話城市發展應要通盤考慮，既要有住宅又要有綠化，唔可以就一個議題而貿然作出決定。
